Së fundmi, Grida Duma është kthyer nga politikane opozitare në gazetare dhe prezantuese televizive në Top Channel. Ky transformim ndodhi sapo hoqi dorë nga mandati i deputetes, dhe mori një talk-show në Prime-Time në Top Channel.
Mirëpo, kjo duket se nuk është pritur mirë nga gazetarë të njohur në vend, një prej tyre edhe Enkel Demi.
Gazetari dhe shkrimtari komentoi në një intervistë për Euronews Albania fenomenin e politikanëve që bëhen gazetarë.
Demi u shpreh se të kalosh nga gazetaria në shkrimtari është një gjë shumë e lehtë, pasi janë dy fusha që kanë shumë lidhje me njëra-tjetrën, ndërsa theksoi se me hapjen e rrjeteve sociale gazetarinë është duke e bërë kushdo.
Sipas Demit, dëshira për kontakt me publikun është e madhe ndaj nuk është për t’u çuditur prirja e politikanëve drejt gazetarisë
“Të kalosh nga gazetaria në shkrimtari është gjë e lehtë; Markez një nga librat më të mirë e ka nga një kronikë e shkruar në gazetë. Sa i përket të tjerëve që bëjnë gazetari, joshja është e madhe, dëshira për kontakt me publikun është e madhe. Por gazetaria nuk është zeje që mund ta bëjë kushdo, është profesion. Sot për fat të keq me hapjen e rrjeteve sociale, ‘budallai i lagjes’ ia thotë mendimin të gjithëve. Sa i përket politikanëve që bëhen gazetarë s’kemi pse të çuditemi apo xhelozohemi, le ta bëjë, secili duhet të mësojë nga gabimet e veta”, tha Demi.
