Katër persona, përfshirë një ish-deputet të Parlamentit Evropian, u arrestuan këtë të premte në Bruksel, si pjesë e një hetimi për dyshime për korrupsion brenda Parlamentit Evropian, shkruajnë mediat e huaja.
Vendi nga ku ishte dyshuar të kryhej korrupsioni, nuk përmendet nga prokuroria që ka kryer hetimet. Sipas gazetës belge Le Soir, është Katari, zyrtarët e të cilit ishin përpjekur të korruptonin një socialist të zgjedhur italian, që ishte eurodeputet nga viti 2004 deri në vitin 2019.
Dyshohet se janë kryer akte të tjera korrupsioni dhe pastrimi parash nga një bandë e organizuar.
Sipas një njoftimi për shtyp të prokurorisë, hetimi synon ndër të tjera akte “korrupsioni” dhe “pastrimit të parave” në një bandë të organizuar. Identiteti i të arrestuarve nuk është bërë i ditur nga prokuroria federale, e cila ka juridiksion në Belgjikë për rastet e terrorizmit dhe krimit të organizuar. Përveç katër arrestimeve, policia ka sekuestruar rreth 600 mijë euro para cash, si dhe pajisje kompjuterike dhe celularë, përmbajtja e të cilave do të analizohet.
