Gazetarja Dorontina Bylykbashi ka përshkruar momentin e një shpërthimi, teksa ajo po raportonte për situatën në veri të Kosovës.
Në një intervistë për gazetarin Nertil Agalliu, Bylykbashi u shpreh se ishte një moment frikësues dhe nuk arriti të identifikonte se çfarë mjeti është hedhur.
Më tej ajo tregoi se sulmet filluan në momentin që mediat serbe u larguan dhe në vendin ku ajo po raportonte shiheshin persona të mashkuar që u përkisnin grupeve kriminale të zonës .
“Nuk mundëm që ta identifikonim se çfarë mjeti është hedhur. Në ato momente dëgjoja duke më thirrur kameramani. Nuk kam parë dot pas se çfarë ndodhi, por ishte një moment shumë frikësues pasi se kisha idenë se çfarë mjeti është. Kur u larguan mediat serbë filluan sulmet dhe dëgjohej edhe muzikë nacionaliste në ato rrethina. Atje shihen persona të maskuar të cilët u përkasin grupeve kriminale atje. Disa kishin mbuluar kokën me kapele dhe maska të zeza. Janë ato grupe që veprojnë ashtu’, tha gazetarja.
Ndër të tjera Bylykbashi tregoi se momentalisht, situata në veri të Kosovës është e qetë dhe numri i policëve të Kosovës, Eulex-it dhe KFOR-it janë shtuar.
