Presidenti turk Rexhep Tajip Erdogan thotë se numri i të vdekurve në vend nga tërmetet e së hënës ka arritur në të paktën 9,057, ndërsa punonjësit e shpëtimit vazhdojnë të kërkojnë për viktimat e varrosura nën malet e rrënojave.
Të paktën 2,662 persona të tjerë janë vrarë në Siri, sipas të dhënave nga qeveria në Damask dhe grupet e shpëtimit në rajonet e kontrolluara nga rebelët.
Shifrat e fundit e çojnë numrin total të vdekjeve në 11,719.
Koha po mbaron për të mbijetuarit e bllokuar nën rrënojat e tërmeteve në Turqi dhe Siri, teksa përpjekjet e kërkim-shpëtimit po i afrohen kufirit vendimtar prej 72 orësh, tha një ekspert i reagimit të shpejtë dhe shpëtimit, të mërkurën.
Më shumë se 90 për qind e të mbijetuarve të tërmetit shpëtohen brenda tri ditëve të para, tha Ilan Kelman, një profesor i fatkeqësive dhe shëndetit në University College London.
Por, ky numër mund të ndryshojë ndjeshëm në varësi të motit, pasgoditjeve dhe sa shpejt ekipet e shpëtimit dhe pajisjet mund të mbërrijnë në vendngjarje. Aktualisht, të gjithë faktorët janë kundër këtyre përpjekjeve në Turqi dhe Siri.
