Është shpallur këtë të premte konkursi ndërkombëtar për projektin e Muzeut “Besa”, muze për historinë e shpëtimit të hebrejve në Shqipëri.
Në fjalën e tij, kryeministri Edi Rama u shpreh se ky projekt do t’i hapë rrugën krijimit të një destinacioni jo vetëm të historisë së shpëtimit të hebrejve gjatë Luftës së Dytë Botërore, por edhe traditës, kulturës dhe artit hebraik.
Teksa përmend dokumentacionet historike, Rama tha se në Shqipëri, qytetarët nuk dorëzuan asnjë hebre të vetëm te nazistët.
Për kreun e qeverisë, konkursi i sotëm shënon një hap shumë të rëndësishëm dhe pa kthim për realizimin e kësaj vepre.
“Është një tjetër moment shumë i rëndësishëm për historinë, zhvillimin urbanistik dhe arkitekturën e Tiranës dhe më në fund mund të marrim frymë të lehtësuar nga një barrë e kahershme detyrimi në raport me fëmjët tanë dhe vizitorët e vendit tonë që lidhet me mbase faqen më të lavdishme të historisë së shqiptarëve, shpëtimi i hebrejve gjatë Luftës së Dyëtë Botërore. Shqipëria është i vetmi vend në Europë që kishte më shumë hebrej pas Luftës së Dytë Botërore sesa përpara Luftës së Dytë Botërore. Është një vend ku, siç tregon dokumentacioni historik, banorët nuk dorëzuan asnjë hebre të vetëm te nazistët, një vend ku historitë e shpëtimit të hebrenjve nga njerëzit e zakoshëm, janë një arkiv i tërë skenarësh për filma që padiskutim do të rrinin me shumë dinjitet krah për krah kryeveprash të kinematografisë. Ne nuk e kemi ende të shënjuar këtë histori në turpin e vendit tonë si një sinjalistikë urbane. Tani kemi nisur dhe fatmirësisht nuk është kjo vepra e parë, është e dyta në radhë pasi më parë kemi nisur Muzeun e Hebrejve në Vlorë. Një destinacion i ri në qytet për ata që duan të njihen me këtë faqe të lavdishme por edhe për të rinjtë që duan të njihen me historinë e shtetit të Izraelit. Sot hedhim një hap shumë të rëndësishëm dhe pa kthim për ta realizuar këtë vepër”, u shpreh Rama.
