Duke lëvizur grumbuj rrënojash me shkopin e tij, Akin Bozkurt ngushëllon veten duke menduar se zbulimi i një trupi do t’u japë të afërmve mundësinë të varrosin të dashurin e tyre dhe të kenë një varr ku mund të vajtojnë.
“Nëse lutem për të gjetur një të vdekur? Po… për t’ia dorëzuar trupin e tij familjes,” tha ai.
42-vjeçari, i cili është pjesë e ekipit të kërkim-shpëtimit, udhëtoi për në qytetin juglindor turk të Kahramanmaras, epiqendrën e tërmeteve të 6 shkurtit, nga Cezarea (250 kilometra në veri) për të ndihmuar në kërkime.
“Kur nxjerrin një trup nën tonelata rrënojash, familjet presin me shpresë… Ata duan të kenë mundësinë e një varrimi të denjë”, thotë Bozkurt.
Ai rrëfen një ngjarje kur një baba duke u përpjekur të ngrohej pranë rrënojave të shtëpisë së tij iu afrua dhe iu lut të gjente se çfarë mund të kishte mbetur nga vajza e tij.
“Ai na tha: Ju lutemi gjeni të paktën një pjesë të trupit të vajzës sime që ta di se ku është varri i saj”, thotë 42-vjeçari, duke shtuar se; “…është vërtet tragjike!”.
Në varrezat e qytetit, mijëra varre të reja janë hapur.
Më shumë se 46,000 njerëz janë vrarë në Turqi dhe Siri që nga tërmetet e 6 shkurtit dhe numri pritet të rritet më tej ndërsa operacionet për gjetjen e të mbijetuarve në rrënoja po mbyllen.
