Presidenti turk, Rexhep Tajip Erdogan, është zotuar të nxjerrë para drejtësisë, të gjithë përgjegjësit për vdekjet si pasojë e tërmeteve shkatërruese që goditën Turqinë. Qeveria turke është përballur me kritika të forta për politikat e saj të planifikimit urban, pasi mijëra ndërtesa banimi u shembën, duke bllokuar mijëra persona nën rrënoja.
“Është detyra jonë t’i bëjmë përgjegjës ata që kanë keqndërtuar dhe t’i nxjerrim ata para drejtësisë,” tha Erdogan.
Presidenti turk njoftoi po ashtu se do të ndërmerren hapa për të bërë një sërë ndryshimesh në mënyrën e të ndërtuarit, teksa theksoi se 200,000 ndërtesa banimi do të ndërtohen në tokë të fortë dhe bazuar në praktikat e mira në njëmbëdhjetë provincat e goditura nga tërmeti shkatërrues.
Turqia dhe Siria u goditën nga një tërmet i fuqishëm prej 7.8 ballë mëngjesin e 6 shkurtit, ku sipas të dhënave të fundit, numri i të vdekurve nga tërmetet në Turqi ka shkuar mbi 42 000.
