Pas vendimit të Gjykatës së Apelit për të zhbërë vendimin e Agron Zhkurit për çështjen e Partisë Demokratike, Indrit Sefa, avokati i Partisë Demokratike të Alibeajt thotë se tashmë është momenti që demokratët të bashkohen.
Në një intervistë për mediat dje në mbrëmje, Sefa theksoi se ky vendim është një ditë që i shërben PD-së dhe se ka qenë i bindur për vendimmarrjen e Apelit. Madje sqaroi se grupi i Alibeajt, do të regjistrohen në KQZ për zgjedhjet e 14 majit, ndërsa i bëri thirrje palës tjetër të bëhen bashkë për 14 majin.
“Është një ditë që i shërben PD-së. PD patjetër do marrë vendimmarrje për tu regjistruar në zgjedhjet e 14 majit. Beteja është përballja me Edi Ramën është një moment fillestar për të gjithë palët që të gjejmë hapësira për të dalë përballë Ramës me kandidaturat. Është çështje teknike, përfaqësimi ligjor i ka të kapërcyera. Do marrim pjesë në zgjedhje do jetë vendimmarrja e organeve kolegjiale që do të mblidhet shumë shpejt.
PD do regjistrohet në KQZ. Të jeni të bindur se për çështje teknikalitetesh nuk mund të jem unë, por janë përcaktimet ligjore që janë në fuqi dhe që organet shtetërore janë të detyrueshme për tu zbatuar. S’ka fitore në këtë vendimmarrje. Kam qenë i bindur për vendimmarrjen e Apelit dhe mendoj se e gjithë retorika ime ka qenë në këtë drejtim dhe kam qenë konseguent për vendimin që kam marrë. Ndihem mirë për rezultatin e procesit gjyqësor, por është një moment që do të shërbejë për bashkimin e demokratëve”, deklaroi ai. Më tej Sefa theksoi se debati nuk është për selinë e PD-së, por për legjitimitetin e organeve të Partisë Demokratike.
“Debati nuk ka qenë kurrë për seli, por për legjitimitetin e i organeve të PD-së. Nuk ka qenë kurrë qëllim vula. Në këtë moment jemi në këtë fazë do të bëjmë të gjitha përpjekjet për të bashkuar spektrin opozitar. Kemi dy platforma bashkimi dhe mendojmë se vetëm nëpërmjet bashkimit mund të sjellim një alternativë fituese. Kjo nuk është një fitore por një moment për reflektimin e palëve në këtë proces të tejzgjatur”, nënvizoi Sefa.
