Analisti Ilir Demaliaj u shpreh se edhe nëse zgjedhjet bëhen të rregullta, sërish Partia Demokratike nuk do të regjistrojë fitore të madhe.
Gjatë një prononcimi për mediat, Demaliaj theksoi se Sali Berisha nëse hyn në zgjedhjet e 14 majit me kandidatët e tij, mund të fitojë 10 bashki.
Sipas Demaliajt, qytetarët e kanë humbur besimin te politikanët. “Unë mendoj që Partia Demokratike, në çdo variant është e humbur. Unë nuk besoj, ashtu siç thotë Berisha që do të vijë uragani popullor, se edhe po të bëhen zgjedhjet edhe në mënyrë normale, Partia Demokratike nuk do të dalë ndonjë fituese e madhe.
Gjendja sot, ka humbur besimi, kanë një lloj neverie njerëzit, sepse njerëzit shohin. Unë kam thënë që Partia Demokratike, në këtë gjendje që është mund të marrë 10 bashki. Por nuk ka forcë, nuk ngjall shpresë”, deklaroi ai.
Ndërkohë më herët Ilir Demaliaj u shpreh se për PD nuk ka rëndësi ku shkon vula, por Partia Demokratike ka “vdekur” dhe vula i ka humbur me kohë pasi ka humbur filozofinë e saj si parti. “Unë mendoj se ajo parti i takon Berishës dhe nuk ka rëndësi se kush e ka vulën. Por, Partisë Demokratike i ka humbur vula me kohë, pasi kjo parti asnjëherë nuk ka pasur një filozofi apo një doktrinë të djathtë.
Partia Demokratike si parti ka fituar vetëm një palë zgjedhje, ato të vitit ‘92. Por kjo parti sot është pasojë e gjithë rrjedhës së saj me një autoritarist si Berisha.
Duhet ngritur debati se çfarë duhet bërë dhe nuk ka më rëndësi se ku ka shkuar vula. Largimi i atyre deputetëve që u larguan duke u kthyer kundër Berishës, ose kundër Bashës. Çfarë mund të themi pastaj për koalicionin me një filogrek.
Kjo e ka shndërruar PD në një parti provinciale”, nënvizoi Demaliaj.
