Ylli i Real Madridit, Eden Hazard ka zbuluar shkallën e marrëdhënies së tij të dëmtuar me Carlo Ancelottin.
Belgu ka kaluar dhe po kalon një kohë të “mjerueshme” në Madrid, për shkak të lëndimeve dhe mospërshtatjes, me ish-anësorin e Chelsea që lufton për të arritur formën që e bindi klubin spanjoll të paguajë 100 milionë euro për të në 2019.
32-vjeçari ka pranuar zhgënjimin e tij për mungesën e minutave me Los Blancos, pasi Ancelotti e ka ulur atë nga ekipi i parë.
Ai nuk ka luajtur asnjë minutë në La Liga apo Ligën e Kampionëve që nga kthimi i tij nga Kampionati Botëror, pavarësisht se ishte i aftë për të luajtur.
“Do të doja të qëndroja. E kam thënë gjithmonë këtë. Shpresoj të luaj dhe të tregoj se ende mund ta bëj”, ka thënë ai për AS.
“Njerëzit kanë dyshime, kjo është normale, e kuptoj. Por për mua, unë jam ende këtu vitin e ardhshëm. Asnjëherë nuk e dini, por një transferim nuk është në planin tim”.
“Ka respekt mes Ancelottit dhe meje. Por, nuk do të them se flasim me njëri-tjetrin, sepse nuk e bëjmë këtë. Por, do të ketë gjithmonë respekt”.
“Duhet të kem respekt për një njeri si Ancelotti. Për atë që përfaqëson për futbollin dhe për atë që ka bërë në karrierën e tij”, ka shtuar më tej belgu.
Real Madridi është i hapur për të shitur Hazardin këtë verë, pasi ai hyn në 12 muajt e fundit të kontratës së tij.
