Tottenham shkarkon Conten. Lajmi ishte në ajër prej ditësh por mbrëmjen e të dielës ka ardhur edhe zyrtarizimi i prishjes së bashkëpunimit mes palëve.
Klubi londinez sqaron se palët kanë vendosur me marrëveshje divorcin, teksa vendin e Contes do ta marrë ndihmësi i tij i parë, Cristian Stellini.
Ky i fundit do të ketë si ndihmës Ryan Mason, ndërsa presidenti i Tottenhamit, Daniel Levy bëri thirrje që skuadra të bashkohet për të dhënë maksimumin në 10 ndeshjet që kanë mbetur në kampionat.
Largimi i parakohshëm i Contes lidhet me shpërthimin e italianit pas ndeshjes me Southampton, ku akuzoi futbollistët e tij, por edhe klubin, për sjellje joprofesionale…
Conte mori drejtimin e Tottenhamit në dimrin e 2021-shit dhe firmosi kontratë të vlefshme deri në qershor të këtij viti, por rezultatet nuk ishin ato të pritshmet dhe palët kishin vendosur të mos rinovojnë.
E ardhmja e Contes pritet të jetë sërish në Serinë A, ku Juventus dhe Inter po bëjnë sondazhe për ta rikthyer.
