Nënshkruhet marrëveshja mes Qeverisë Shqiptare dhe asaj Italiane, e cila parashikon investimin për përmirësimin e rrjetit shpërndarës të energjisë elektrike në zonat Shkodër, Lezhë, Fushë-Krujë.
Marrëveshja është nënshkruar nga Zëvendëskryeministrja, njëherësh Ministrja e Infrastrukturës dhe Energjisë, Belinda Balluku dhe Zëvendësministri i Jashtëm italian, Edmondo Cirielli.
Gjatë fjalës së saj, ministrja Balluku ka deklaruar se me anë të kësaj marrëveshje, shteti shqiptar do të marrë një hua prej 35 milionë Eurosh.
Belinda Balluku: Me anë të kësaj marrëveshje, shteti shqiptar do të marrë një hua prej 35 milionë Euro dhe përmes kësaj huaje ne do të zhvillojmë një projekt, i cili konsiston për përmirësimin e shpërndarjes në Shkodër, Lezhë dhe Fushë-Krujë, me fokus kryesor përmirësimin e sistemit Skada dhe rrjetin e tensionit të mesëm.
Përmirësimi dhe moderninimi i sistemit energjitik ka qenë përparësi e qeverisë. Vëmendje i është kushtuar sistemit të shpërndarjes, prodhimit dhe transmetimit të energjisë. Në vitin 2013, fatkeqësisht, ne trashëguam një rrjet të amortizuar. Nga ajo kohë, situata ka ndryshuar katërcipërisht. Nuk bëhet fjalë më për ndërprerje të energjisë elektrike dhe në ditë me mot të keq.
2 vitet e fundit kanë qenë të vështira pasi ne jemi përballur me pandeminë, por edhe me krizën energjitike, ne kemi mbajtur premtimet e bëra, duke ulur nivelin e humbjeve përmes investimeve. Kjo marrëveshje që do të nënshkruajmë sot do të ndikojë fuqishëm në përmirësimin e shpërndarjes së energjisë elektrike.
Parësore për ne ka qenë të mbronim abonenët duke mos prekur çmimin e energjisë elektrike. Shpresojmë që 2023 të jetë një vit më i qëndrueshëm dhe çmimet të jenë në rënie. Shpresojmë që në 2023 të kemi mundësi për të rritur investimet në fushën energjitike. Marrëveshja që po nënshkruajmë sot është pjesë e këtij bashkëpunimi për përmirësimin dhe modernizimin e shpërndarjes së energjisë elektrike sidomos në veri të vendit.
