Bujar Hashani, drejtor i prodhimit në minierën “Trepça”, ka dhënë lajmin e mirë se të gjithë minorët që ishin të bllokuar që nga mbrëmë në galeritë e minierës, tanimë janë nxjerrë dhe gjendja shëndetësore e tyre është e mirë.
“Gjendja aktuale e minatorëve është e mirë, ata tani kanë dal nga miniera. Kemi arrit që me sukses t’i nxjerrim të gjithë minatorët, gjendja shëndetësore e tyre është e mirë. Tani po punojmë në vënien në shërbim të stabilimenteve bartëse. 10 minatorë kanë dal vet shkallëve, një pjesë e minatorëve, atyre më të vjetër, iu kemi thënë të presin dhe i kemi nxjerrë nga miniera dhe tani gjithçka është në rregull”, tha Hashani për RTK.
Ai shtoi se miniera është e vjetër dhe stabilimentet bartëse janë të vjetra. “Ne kemi kërkuar edhe më herët që këto stabilimente të ndërrohen dhe raste të tilla mos të përsëriten”, vijoi Bujar Hashani.
Rreth 50 minatorë kanë mbetur të ngujuar nga mbrëmë në horizontet 5, 8 dhe 11 të minierës “Trepça”, rreth 900 metra nën tokë. Shkak i ngujimit të tyre kanë qenë problemet me energjinë elektrike. Pas 18 orësh ata janë shpëtuar të gjithë.
