Bizmesmeni dhe politikani nga Lezha, Ardian Nikulaj, i cili u ekzekutua pasditen e 19 prillit në ambientet e resortit të tij në Shëngjin, duket se i druhej një atentati të mundshëm.
Sipas BW mësohet se Nikulajt i janë bërë disa herë tentativa për ta eleminuar, dy nga të cilat gjatë viteve të fundit.
Në vitin 2019, në Shëngjin do të përhapeshin zëra se në zonën e Shëngjinit kishte mbërritur një vrasës me pagesë për të ekzekutuar biznesmenin Nikulaj. Alarmi i ngritur bëri që atentatori të tërhiqej, pasi organet ligjzbatuese arritën të merrnin informacionet në kohë dhe të vepronin.
Tentativa tjetër dyshohet se u bë nga disa persona të cilët kishin paguar një grup i cili operon në jug të vendit, që të organizinin vrasjen e Nikulajt. Ky grup, pasi merr përsipër organizimin, tenton të rekrutojë një vrasës me pagesë.
Tentativë, e cila sërish do të dështonte, pasi atentati dekonspirohet dhe nga ai moment, Ardjan Nikulaj shtoi sigurinë dhe lëvizte me makinë të blinduar.
Ndërkohë, duke u ndalur te atentati i fundit ai i cili i mori dhe jetën biznesmenit burime pranë policisë bëjnë me dije se Nikulaj është mbajtur nën vëzhgim prej të paktën 1 javë.
Sipas të njëjtave burime mësohet se nga kqyrja e kamerave të sigurisë në zonë një ditë para ngjarjes, shihet një person me të njëjtën veshje i cili qëndron për disa minuta përreth ambienteve të kompleksit “Cora”, në pronësi të Nikulajt.
Por për shkak të skafandës që mban në kokë identifikimi i tij është i pamundur, ndërsa nuk përjashtohet mundësia që të jetë e njëjti person që ka kryer krimin e rëndë.
Ditën e djeshme u sigurua dhe momenti tronditës i vrasjes së biznesmenit. Siç u pa dhe në videon, autori futet qetësisht në lokal dhe qëllon me armë.
Nga 6 plumbat e shkrepura nga pistoleta tip “TT” në drejtim të biznesmenit Nikulaj, vetëm 5 prej tyre e kanë kapur në pjesë të ndryshme të trupit. Plumbi fatal, sipas ekspertizës mjeko-ligjore, ishte ai në pjesën e ballit, duke sjellë vdekjen e menjëhershme.
Pasi ka kryer ekzekutimin, autori rezulton të jetë larguar sërish me motorin e tij me targa të huaja. Ku nga këqyrja e kamerave të sigurisë ai ka përshkuar itinerarin e rrugës nacionale nga Shengjini në drejtim të Lezhës, dhe deri në fshatin Kakarriq.
