Kryetari i Bashkisë Tiranë, Erion Veliaj, gjatë një takimi me banorët e njësisë numër 10, ka sulmuar opozitën, duke u shprehur se gjatë kohës që ata merren me hallet e tyre, Partia Socialiste mbjell pemë, bën punë dhe projekte.
Nga ana tjetër, Berishën e ka quajtur “non grata” dhe Metën bashkëpunëtor të ish-sigurimit.
“Hallet e Saliut dhe të Ilirit do bëhen hallet tona? Pra, njëri që është ‘non grata’, ose ka qenë sigurims, do kthehet në hallin tonë, apo hallet e komunitetit do gjejnë zgjidhje te ne? Unë besoj se është kjo e dyta. Detyra jonë nuk është t’u pëlqejmë të gjthëve, detyra jonë është t’u shërbejmë të gjithëve. Duke u shërbyer të gjithëve, unë besoj që shkojmë përpara.
Mjafton të shikoni vlerën e pronës: Në Njësinë 10 është 2-3-fishuar. Edhe dikush që nuk na voton, nuk na mbështet, vetëm duke ndenjur në shtëpi, është bërë 2-3 herë më i pasur sot. Edhe sheshi ‘Adem Jashari’ ishte i rrethuar nga makinat, me trafik, dhe në vend që të nderohej si hero, mbushej me pluhur. Sot është kthyer në një hapësirë, ku edhe ai që ndoshta nuk e thotë dot një fjalë të mirë për arsye politike, e dëgjon gurgullimën e shatërvanit, i shikon edhe pemët.
Vendimi ynë që, një pjesë të fondit ta çojmë për të mbjellë pemë, është pikërisht për të ilustruar se duam të mbjellim pastërti, gjelbërim, oksigjen, jo sherr, jo inat, jo përçarje. Data 15 maj do të jetë një ditë gëzimi për ta çuar qytetin përpara, jo një ditë ku ne të fillojmë prapë të heqim posterat nga muret”, u shpreh Veliaj.
