Kryetari i PL-së Ilir Meta ka kërcënuar kreun e qeverisë se do të përballet me reagimin e fortë të opozitës nëse prek votën e lirë të qytetarëve. Sipas tij, Rama nuk i ka fituar asnjëherë zgjedhjet, por i ka vjedhur dhe blerë ato.
Kryetari i Partisë së Lirisë, Ilir Meta, ka paralajmëruar kryeministrin Edi Rama lidhur me zgjedhjet e 14 majit dhe vjedhjen e votave. Përmes një interviste në Neës 24, Meta tha se Rama duhet të gjejë vend ku të futet në rast se në zgjedhjet e 14 majit vidhet qoftë edhe një votë. “Ne do të jemi përballë qendrave të votimit. Ne jemi treguar të durueshëm ndaj të gjitha provokimeve që ka bërë ky bandit. Ky po bën çdo lloj provokimi. Atë ditë po u prek një votë, ky ta gjejë vetë vendin ku të futet. Qytetarët kanë një detyrë. Qytetarët do të shkojnë të votojnë. Të gjithë ata që na ndjekin, që janë qytetarë, njerëzit janë vrarë dhe nuk e kanë shfrytëzuar të drejtën e votës”-tha Meta.
Ai shtoi se opozita është treguar e duruar ndaj provokimeve të kryeministrit, të cilin e quajti bandit, por shtoi se pas 14 majit, ata do ta menaxhojnë Ramën shumë mirë. “Nëse nuk janë të kënaqur, ta ndëshkojnë me votë. Mos ki merak ti, do i numërojmë vetë votat tona ne. Njerëzit të bëjnë detyrën dhe të mos bien vitima të propagandës së ktij me paratë e inceneratorëve që nuk ekzistojnë. Po mbyllen lokalet e dasmave se nuk ka më dasma, po falimentojmë. Po vijoi kështu, do të mbyllen edhe furrat e bukës. Ne nuk jemi të pabesë siç është ky sekt shkatërrimtar.
Ne do ta lajmërojmë. I bëjmë thirrje presidentit dhe institucioneve të pavarura, si dhe vëzhguesve ndërkombëtarë që të ndërhyjnë përpara se të vidhen votat. Ama ne votat e qytetarëve do t’i mbrojmë me çdo çmim. Rama nuk ka fituar asnjë palë zgjedhje. Ka blerë kryetarin e opozitës atëherë. S’kemi çfarë i bëjmë Ramës, na qëlloi një i sëmurë, do ta menaxhojmë shumë mirë ne pas 14 majit”, u shpreh Meta.
Ai gjithashtu ka mbrojtur Berishën përsa i përket çështjes së shpalljes “non grata” nga SHBA. Sipas Metës këtë çështje po e shëtit Rama në Shqipëri, ndërsa theksoi se kryeministri nuk ka moral të përmendë diçka të tillë pasi është i përfshirë në skandalin McGonigal. Sa i përket deklaratave të ditëve të fundit në fushatë nga kreu i qeverisë, Edi Rama, Meta deklaroi se “të vjen për të vjellë kur flet për non-grata shoku i McGonigal”, ndërsa shtoi se kërcënimi i tij për të mos bashkëpunuar me pushtetin vendor në të ardhmen nuk është normal për një vend që synon BE-në. “Këlliçin do e mbështesim si çdo kandidat të Primareve që e kanë zgjedhur qytetarët. Këlliçi është shumë pozitiv dhe i motivuar. Në vend të gishtit duhet të kishte topin e Mato Grudës për të qëlluar korrupsionin e frikshëm në bashkinë e Tiranës. E dimë shumë mirë ku shkojnë lekët e inceneratorëve. Ai e ka për të qëlluar me top korrupsionin absolut. Ne do kalojmë nga korrupsioni absolut në transparencë absolute, kjo është marrëveshja që kam firmosur me Berishën”-deklaroi kreu i PL-së.
