Forcimi i kursit të këmbimit të Lekut ndaj Euros sipas Bankës së Shqipërisë është shenjë e progresit të bërë nga ekonomia shqiptare.
Në përgjigjen drejtuar disa shoqatave që ditë më parë kërkuan ndërhyrje për normalizimin e situatës, Guvernatori Gent Sejko ka renditur edhe faktorë e nënçmimit të Euros në vend.
“Deficiti tregtar në mallra dhe shërbime shënoi një rënie vjetore prej 8.2%, ndërsa deficiti i llogarisë korrente një reduktim vjetor prej 7.4%. Në këtë ecuri, një kontribut të fortë ka dhënë rritja e shpejtë e eksporteve shqiptare, nga niveli 4. 8 miliardë Euro në vitin 2021 në nivelin 6.7 miliardë Euro në vitin 2022. Kjo rritje është ndihmuar nga rritja e shpejtë e eksportit të shërbimeve, në veçanti turizmi, nga niveli 3.5 miliardë Euro në vitin 2021 në nivelin e 4.8 miliardë Eurove në vitin 2022. Në të njëjtën kohë, remitancat u rritën me thuajse 10% gjatë vitit 2022, ndërsa investimet e huaja direkte me rreth 33%. Të dy këta zëra kanë gjeneruar flukse hyrëse shtesë valutore prej më shumë se 400 milionë euro gjatë vitit 2022.”
Sipas Bankës Qendrore, forcimi i kursit ka ndihmuar në kontrollin e inflacionit në vend si dhe ka ulur borxhin publik.
“Forcimi i kursit të këmbimit ka ndihmuar qëndrueshmërinë e bilanceve financiare të kredimarrësve në valutë, duke pasur një efekt direkt pozitiv ne nivelin e kredive me probleme dhe në stabilitetin financiar të vendit. Së fundi, forcimi i kursit të këmbimit ka përmirësuar qëndrueshmërinë e borxhit të huaj të ekonomisë shqiptare, duke reduktuar edhe kostot e tij të financimit në tregjet ndërkombëtare”.
Banka e Shqipërisë vlerëson se nuk mund të ndërhyjë direkt, sa kohë kursi i këmbimit pasqyron çrregullime të tregut valutor.
