Nga Elton Qyno
Një aparat telefoni që përdorej nga biznesmeni Lirim Fezollari është bllokuar nga oficerët e Byrosë Kombëtare të Hetimit, të cilët janë duke vijuar hetime për çështjen penale që tashmë njihet në publik si dosja “Buka”.
Redaksia ka mësuar se celulari i një marke të njohur, i është sekuestruar pronarit të “Tobaco Holding Grup”, me qëllim kryerjen e një ekspertimi për të mësuar lidhjen e ngushtë mes Fezollarit dhe ish-ministrit të Financave, Arben Ahmetaj.
Dyshohet se mes biznesmenit dhe Fezollarit, ka pasur një marëdhënie përtej komunikimit institucional, marëdhënie nga e cila Fezollari me ndihmën e Arben Ahmetaj, ka arritur të privatizojë aksisonet e shoqërisë aksionere “Buka Sh.a”.
Por me sa duket për të provuar miqësinë mes Ahmetaj dhe Fezollari, SPAK dhe oficerët e BKH-së, kanë vendosur ti bllokojnë telefonin biznesmenit.
Bllokimi është kryer pikërisht ditën kur Lirim Fezullari, është paraqitur në SPAK, për të dhënë shpjegime lidhur me privatizimin e dyshimtë të aksioneve shtetërore të ish-Fabrikës së Bukës për Tiranën.
Megjithëse biznesmeni ka mohuar njohjen me Ahmetaj dhe zyrtarë të ministrisë së Financave, SPAK ,ka ngritur dyshime të forta të mbështetura dhe në indicie se Fezollari dhe Arben Ahmetaj, kanë njohje me njëri-tjetrin.
Nga ana tjetër Lirim Fezollari, përmes avokatëve të tij, ka kërkuar kthimin e aparatit të telefonit. Por nuk ka mundur ta marë sërisht, pasi tashmë celulari po i nënshtrohet një ekspertize kompjuterike.
Ndaj Lirim Fezollari, anëtarëve të komisionit të ankandit në Ministrinë e Financave dhe Ekonomisë dhe ish-ministrit Ahmetaj, SPAK po kryen hetime për akuzën e “Korrupsionit pasiv i funksionarëve të lartë shtetërorë”, “Shpërdorim detyre” dhe “Pabarazi në tendera dhe ankande publike”.
Aksionet shtetërore të “Buka” Sh.a, që sot ndodhet në teritorin ku është ngritur kompleksi i lojrave “Latitude” dhe jo vetëm, u privatizuan me firmë të ish-ministrit Arben Ahmetaj.
Këtë procedurë kishte refuzuar ta kryente paraardhësi i Ahmetaj, ministri Shkëlqim Cani, i cili pak kohë më parë u thir në SPAK për të dëshmuar rreth këtij rasti.
“Buka Sh.a” është një pronë me mijëra metra katror, mjaft e lakmuar në Tiranë, e cila i është njohur prej vitit 1994 nga Agjencia e Kthimit dhe Kompensimit të Pronave, familjes Myderzi.
Por përmes një procedure ankandi të hapur në 2014 nga ish-ministri i Financave, Arben Ahmetaj, përfitues i aksioneve shtetërore të kompanisë “Buka Sh.a” është bërë biznesmeni Lirim Fezollari.
Kjo procedurë ankandi, ka shkelur një seri vendime gjyqësore duke përjashtuar pronarët e ligjshëm të tokës, ku ndodhet ish-fabrika e Bukës.
Ndërkohë hyrja e Lirim Fezollarit si aksioner në “Buka Sh.a” daton prej 5 shtatorit 2014, kur ai ka filluar të blerë aksione të kësaj shoqërie tek individë privatë.
Por një manovër ankandi e hapur nga ish-ministri Ahmetaj, e ka bërë atë pronarin kryesor të kësaj shoqërie, duke përfituar pjesën dërmuese të pronës që ndodhet në rrugën e “Kavajës”.
Sipas dosjes hetimore në Gusht 2015, Ministria e Financave shpall biznesmenin Fezollari, fitues të ankandit për blerjen e aksioneve të shoqërisë anonime “Buka” sha.
Ndërsa kontrata e fundit noteriale që Lirim Fezollari, ka kryer për blerje aksionesh tek “Buka Sh.a”, daton në 24 Mars 2022, duke i blerë kuotat kundrejt 20 mijë euro, Agim Lahit dhe Drita Lahit.
