Policia ka shoqëruar ditën e sotme në ambientet e komisariatit drejtorin e Ujësjellës-Kanalizimeve në Shkodër, për porositjen e disa pakove me ushqime gjatë fushatës elektorale.
Lidhur me shoqërimin e tij ka reaguar dega e PD-së së Shkodrës. Ajo deklaron se drejtori i Ujësjellës-Kanalizimeve, njëkohësisht nënkryetari i FRPD-së, është ndaluar në mënyrë abuzive dhe pa asnjë shkresë.
Sipas tij, aksioni i policisë është kryer me urdhër politik nga kryeministri Edi Rama.
Deklarata e plotë:
Në një kohë kur krimi po bën ligjin dhe shteti shqiptar është gjunjëzuar përpara tij, policia e shtetit vijon ti bindet urdhërave politik. Pa asnjë shkresë dhe në mënyrë abuzive është ndaluar gjatë orëve të mbrëmjes nga policia e Shkodrës dhe është shoqëruar në komisariatin e Shkodrës n/kryetari i FRPD së Shqipërisë, Arvit Bushati.
Efektivët e policisë pa asnjë shkresë, por vetëm nga urdhërat politikë të shpërndara përmes telefonit bënë ndalimin e tij duke zgjedhur t’i nënshtrohen kërkesave absurde të eprorëve, ndërsa bëjnë sehir përpara krimit që ka mbërthyer Shkodrën duke mbjellë pasiguri për qytetarët e saj. Kjo situatë kriminale ku për ligjin nuk pyet askush, është fytyra e vërtetë e qeverisë Rama e cila në gjithë këto vite ka zgjedhur që të bëhet palë me të keqen.
Nuk është hera e parë që të tilla skena kryhen në Shkodër ndaj përfaqësuesve të opozitës, përmes ngjarjeve të inskenuara dhe tërësisht antiligjore, vetëm e vetëm për ti intimiduar dhe mbajtur nën presion. Edi Rama dhe bandat e tij me dhe pa uniformën e shtetit, por të sponsorizuara prej tij nuk do t’ja arrijnë të nënshtrojnë opozitën dhe mbështetësit e saj, përtej cdo skeme që do të tentojnë të vënë në zbatim.
Partia Demokratike i bën thirrje policisë së shtetit dhe të gjitha strukturave ligjzbatuese të qëndrojnë larg urdhërave politik pasi do të përballen me forcën e ligjit dhe nuk do të ketë Edi Ramë që ti mbrojë përballë këtij skenari antiligjor që është ngritur në këto 10 vite në vend.
