Deputeti i Partisë Demokratike, Dashnor Sula ka shpërthyer me tone të ashpra sot në Kuvend, teksa ka komentuar edhe video skandalin e ish-kryebashkiakut të Kukësit, Safet Gjici.
Sula u shpreh se zyrat e shtetit janë kthyer në “bordello dhe askush nuk flet”, duke shtuar se kjo ndodh për shkak se kanë interesa për të fituar tendera. Më tej, ai i ka bërë thirrje edhe opozitës, që të mos “mbyllë sytë”, por të denoncojë rastet e abuzimeve edhe korrupsionit.
“I keni kthyer zyrat e shtetit në bordello dhe tu vij turp. Ka pasur problematika gjithmonë, por e dimë të gjithë që nuk reagojnë.
Ky vend po shkon drejt greminës, sepse po ngel vetëm një parti dhe vetëm një regjim, dhe opozita nuk po bën punën dhe nuk denoncon sepse janë të lidhur me biznese. Të dalë opozita këtu dhe të denoncojë kush janë ata që janë të lidhur dhe bëjnë biznese marrin tendera, si nga kjo parti e nga partia tjetër.
E turpshme që për një mandat t’i lëpihet pushtetit dhe për të marrë një rrogë, dhe ajo rritje rroge që u bë, u bë për të na mbyllur gojën ju e ne”, u shpreh deputeti demokrat.
