Gazetari i njohur Roland Qafoku ka reaguar nëpërmjet një postimi në Facebook në lidhje me lajmin e bujshëm të ditës së sotme, kërkesën për arrestim të ish-ministrit Ahmetaj nga SPAK.
Qafoku vlerëson SPAK duke thënë se arrestimi i funksionarëve të lartë të pushtetit tregon guxim dhe vendosmëri. “E gjithë klasa politike është e tronditur rëndë. Majtas dhe djathtas, pa përjashtim”, është shprehur gazetari Roland Qafoku.
Postimi i plotë:
Arben Ahmetaj-zëvendëskryeministër, Saimir Tahiri-ministër i Brendshëm, Lefter Koka-ministër i Mjedisit, Alqi Bllako-deputet, Vangjush Dako-kryebashkiak i Durrësit, Fatos Tushe-kryebashkiak i Lushnjes, Safet Gjici-kryebashkiak i Kukësit. Me arrestimin e këtyre shtatë funksionarëve të lartë të pushtetit socialist për abuzim me detyrën, për herë të parë mund të themi se SPAK-un nuk mund ta akuzosh më për mefshtësi dhe se nuk ka kapur asnjë peshk të madh. Njëkohësisht, mund të themi se pas 4 vitesh nga ngritja e kësaj strukture, në Shqipëri nuk mund të thuhet më se ka njerëz të paprekshëm. Sigurisht që nuk kemi të drejtë ti shpallim fajtorë pa vendosur gjykata dhe pikërisht kjo është beteja më e madhe e SPAK. Megjithatë, duhet të themi se arrestimi i tyre tregon guxim që vetëm disa vite më parë as nuk mendohej. Me këtë skuadrilje në qeli, e gjithë klasa politike është e tronditur rëndë. Majtas dhe djathtas, pa përjashtim. Veçse duhet të themi se ky duhet të jetë vetëm fillimi i fillimit. Nëse vijohet me këtë impenjim, me këtë këmbëngulje dhe më këtë durim, besohet se politika e inkriminuar, zyrtarët e korruptuar, e keqja dhe e liga në këtë vend do të marrë goditje të fortë. Në Shqipëri nuk mund të triumfojnë më ata që kanë abuzuar me pushtetin dhe të kapardisen pastaj me nofkën “të zotë” që ua vendosin beniaminët e tyre po të korruptuar dhe që fatkeqësisht janë në shumicë. Më të mirët dhe më të zotët janë të ndershmit që fatkeqësisht janë pakicë. Por, kjo është Shqipëria e mirë që duhet t’ua ndërtojmë fëmijëve tanë. Bravo SPAK dhe Altin Dumani!
