Projektligji “Për Trajtim të veçantë të studentëve që ndjekin programin e integruar të studimeve të studimit të dytë Mjekësi e Përgjithshme në IAL publike”.
Studentët duhet të firmosin një marrëveshje ku në përfundim të studimeve duhet të punojnë 5 vite në sistemin shëndetësor, e më pas të marrin diplomën.
Nënkryetari i Partisë së Lirisë, Petrit Vasili, Albana Vokshi, si dhe deputetja e PD-së, Ilda Dhori, reaguan ashpër kundër këtij vendimi.
“Zemra e problemit është pagesa, lërini përrallat. Njerëzit kanë dalë në rrugë se duan sa pagat e Kosovës”, tha Vasili.
Pjesë në komision ishte edhe ministrja e Arsimit Evis Kushi si dhe zëvendësministrja Mira Rakacolli. Kushi tha se projektligj synon të parandalojnë largimin e mjekëve por dhe për të plotësuar nevojat në shëndetësi.
“Ne nuk i detyrojmë studentët. Pra, studentët nuk vendosen përpara një detyrimi. Studentët janë të lirë të zgjedhin nëse do të përfitojnë nga lehtësirat apo jo… Ligji nuk e cenon thelbin e kësaj të drejte kushtetuese. Duke qenë se çdo student ka të drejtë të zgjedhë nëse dëshiron të përfitojë nga lehtësitë që krijohen me nënshkrimin e marrëveshjes, apo nëse nuk pranon për të lidhur këtë marrëveshje”, u shpreh ministrja Kushi.
Ndërkohë, Rakacolli u shpreh se një vendim i tillë do të thotë një e ardhme e sigurt për vendin.
“Nuk është vetëm kjo politikë që do të sigurojë ardhjen e mjekëve, por që nga shtimi i kuotave, në përmirësimin e kushteve dhe pagave. Ajo që po bëjmë ne sot është që t’i sigurojmë të ardhmen përmes sistemit shëndetësor qytetarëve”, tha Rakacolli.
Opozita i kërkoi ministres që të ulë detyrimin për punësim nga 5 vite në 3 ose të mos e hedhin në votim. Megjithatë, asnjë nga këto kërkesa nuk u pranua, duke e kaluar projektligjin në votim, i cili më shumicë votash u miratua.
