Udhëtimi me transportin publik në Tiranë, në valën ekstreme të të nxehtit ndonjëherë bëhet sfidues, teksa vështirësia më e madhe janë mungesa e kondicionerëve.
Thuajse problematike të shumta janë tek shumica prej linjave ndërkohë që qytetarët ngrejnë shqetësimin për linjën e Porcelanit ku në disa urbanë ndjehet vetëm zhurma e aspirimit.
Gazetarja: A nuk kanë kondicioner, këto autobusët se vdiqëm?!
Fatorinoja: Ka si nuk ka, por je ulur afër motorit.
‘Ka dhe pa kondicioner.”- tha një qytetare.
“Tmerr! Nuk udhëtohet pa kondicioner se plas vape. Dhe kërkojmë por kur s’ka autobusi s’ka si ndizet. S’ka thotë ai ose kaq fuqi ka!”
Në përpjekje për të përballuar udhëtimin me autobusë, pasagjerët mundohen të freskohen me mjete rrethanore.
Edhe turistët ankohen për mungesën e kondicionerëve në mjetet e transportit publik.
“Është shumë nxehtë brenda.”
Linza është një tjetër linjë problematike, me sedije të grisura dhe autobusë të amortizuar. Qytetarët propozojnë që mjetet e kësaj linje të zhduken nga qarkullimi për t’u zëvendësuar.
“Autobusët shumë të vjetër duhen hequr nga qarkullimi. Pastaj autobusi i Linzës është jashtë standardeve për të gjitha drejtimet, sediljet, kondicioner s’ka, asgjë s’ka.”
Në një reagim për Report TV përfaqësues të kompanisë së kësaj linje thonë se brenda shtatorit do të ketë zëvendësime dhe shtim të flotës së autobusëve.
Moshapja e kondicionerit në temperatura që i kalojnë 40 gradët ndodh edhe në autobusët e linjës Kopshti Zoologjik-TEG dhe Saukut, duke e bërë udhëtimin në transportin publik një mision të pamundur.
