Ministrja e Buqësisë dhe Zhvillimit Rural, Frida Krifca njëherazi presidente e CIHEAM, zhvilloi një takim në Romë me drejtorin e përgjithshëm të OBSH-së, Tedros Adhanom Ghebreyesus, me të cilin diskutoi për rëndësinë e adresimit të politikave, për krijimin e zinxhirëve të fortë ushqimorë dhe garantimin e sigurisë ushqimore.
“Reformat dhe politikat tona kanë në vëmendje të shtuar injektimin e mbështetjes për krijimin e zinxhirëve të fortë ushqimorë dhe politikat më të mira të garantimit të sigurisë ushqimore për përkujdesjen e shëndetit të të gjithë konsumatorëve tanë”, tha Krifca, gjatë takimit me kreun e OBSH-së, Ghebreyesus.
Duke folur për politikat e ndërmarra në mbështetje të bujqësisë dhe sektorit rural në tërësi në raport me zhvillimet globale, ministrja e Bujqësisë dhe Zhvillimit Rural, u ndal në zbatimin e një strategjie konkrete për zhvillimin e Bujqësisë dhe sigurinë ushqimore.
Drejtori i përgjithshëm i OBSH-së, vlerësoi progresin e bërë nga Shqipëria në fushën e zhvillimit rural dhe shprehu mbështetjen e OBSH-së për politikat e qeverisë shqiptare që kanë fokus fermerin, sigurinë ushqimore dhe prodhimin vendas.
“Shpreh të gjithë mbështetjen dhe inkurajimin e OBSH për reformat të cilat kanë vendosur në qendër të politikave tona fermerin, sigurinë ushqimore dhe prodhimin vendas”, tha ai.
Takimi mes ministres së Bujqësisë dhe Zhvillimit Rural, Frida Krifca, njëherazi presidente e CIHEAM-it dhe drejtorit të përgjithshëm të OBSH, Tedros Adhanom Ghebreyesus u zhvillua në kuadër të samitit të OKB-së për Sistemet Ushqimore, që zhvillohet në selinë e FAO-s në Romë.
Ngjarja e nivelit të lartë ka në kryefjalë forcimin e sistemeve ushqimore dhe synon të krijojë një hapësirë të favorshme për vendet që të rishikojnë progresin në angazhimet për veprim dhe të identifikojnë sukseset, pengesat e qëndrueshme dhe prioritetet, në mënyrë që të mbyllin hendekun e zbatimit për transformimin e sistemeve ushqimore.
Në samit marrin pjesë kreu i Organizatës Botërore së Ushqimit, Qu Dongyn, kreu i Organizatës Botërore të Shëndetësisë, Tedros Adhanom Ghebreyesus, ministri italian i Bujqësisë, Francesco Lollobrigida, ministri japonez i Bujqësisë, Katsumata Takaaki. Kreu i organizatës më të madhe të fermerëve në Italia Coldiretti, Ettore Prandini e shumë aktorë të tjerë botërorë të rëndësishëm për forcimin e prodhimit dhe konsumit të qëndrueshëm.
