Jose Mourinho rikthehet në Tiranë. Këtë herë për një sfidë miqësore që Roma do të luajë në kryeqytetin shqiptar mbrëmjen e 12 gushtit përballë Partizanit.
Ka qenë kryeministri i Shqipërisë, Edi Rama, ai që ka dhënë lajmin në rrjetet sociale për miqësoren e luksit që kampionët në fuqi të Shqipërisë do të luajnë ndaj verdhekuqve të Romës.
‘Wow, perandori i ri i Romës rikthehet në Tiranë. Mirësevjen sërish Jose”, shkroi kryeministri, duke e shoqëruar postimin me një foto të portugezit me trofeun e Conference League në dorë.
Është arritur një marrëveshje paraprake mes dy klubeve, për zhvillimin e sfidës mbrëmjen e të shtunës në stadiumin e ri të Partizanit, ‘Arena e Demave’, një impiant me kapacitet rreth 4000 tifozë.
Kjo pasi në “Ari Albania” pritet të bëhet një rikonstruksion, për të qenë gati për sfidën e Kombëtares Shqiptare më 10 shtator ndaj Polonisë. Gjithashtu vlen të theksohet se miqësorja e luksit e Partizanit, do të vijë vetëm dy ditë pas transfertës letone ndaj Valmeirës në turin e tretë eliminator të Conference League.
Kjo do të jetë hera e dytë në harkun e 15 muajve, që Roma vjen në Shqipëri, pasi në maj të 2022-shit verdhekuqtë luajtën dhe fituan finalen e Conference League përballë Feyenoord.
Kjo nuk do të jetë e vetmja miqësore ‘e nxehtë’ gushti për klubet shqiptar, pasi një ditë më vonë në Itali, Egnatia do të përballet me Interin.
