Kryeministri Edi Rama thotë se edhe pse rruga drejt Bashkimit Evropian mund të jetë shumë e ngadaltë, e vetmja rrugë për Shqipërinë është anëtarësimi në union.
Përmes një postimi në rrjetet sociale, Rama reagoi pas vendimit të Komisionit Evropian, që rrëzoi të martën objektivin e Charles Michel për zgjerimin e BE-së në vitin 2030.
Rama përsëriti krahasimin e bërë në Forumin Strategjik të Bledit në Slloveni, ku tha se më mirë të qëndrosh në autobusin e BE-së edhe pa ndenjëse, pasi është më e sigurt se të ulesh në një aeroplan rus, duke iu referuar rrëzimit të avionit të kreut të Wagner, Prigozhin.
“Po sigurisht, kjo është arsyeja pse autobusi nuk mund të bëhet kurrë aeroplan… Gjithsesi më besoni, në statusin aktual të punëve të qëndrosh në autobusin e BE-së edhe pa ndenjëse është më e sigurt se të ulesh në një aeroplan rus, sepse udhëtimi mund të jetë shumë i ngadaltë dhe destinacioni ynë shumë larg, por një gjë është e sigurt si vdekja: Ky autobus nuk do të përplaset kurrë në BE”, shkroi Rama në platformën X./ S.M
