Interi ka njoftuar transferimin e mbrojtësit francez Benjamin Pavard nga Bayern Munich.
Zikaltërit kanë konfirmuar ardhjen e tij me një deklaratë zyrtare për media, ku ai ka nënshkruar një kontratë pesëvjeçare deri në fund të qershorit 2028.
Largimet e Milan Skriniar dhe Danilo D’Ambrosio kishin lënë hapësirë në prapavijë te Interi dhe klubi ishte i detyruar të transferonte një mbrojtës.
Mësohet se dy klubet kanë rënë dakord për një shumë prej rreth 30 milionë euro plus 2 milionë euro bonuse.
Një faktor kyç për mbylljen e transferimit ishte këmbëngulja e Pavard për t’u bashkuar me Interin.
Kontrata e 27-vjeçarit me Bayernin ishte parashikuar të mbaronte në fund të qershorit.
