Ushtria izraelite ka konfirmuar se ka goditur disa objektiva në Liban duke përdorur helikopterët e saj luftarakë. Megjithatë, njoftimi i ushtrisë izraelite nuk jep detaje të mëtejshme mbi natyrën e objektivave që goditi.
Sulmet ajrore izraelite ndaj objektivave libaneze vijnë pas infiltrimit të disa personave të armatosur në veri të Izraelit nga Libia. Më herët, ushtria izraelite tha se trupat e saj arritën të vrasin disa të infiltruar të armatosur.
Ndërkohë, sipas agjencisë zyrtare libaneze të lajmeve ‘NNA’, shefi i ushtrisë libaneze, Joseph Aoun dhe komandanti i misionit paqeruajtës i OKB-së (UNIFIL), Aroldo Lazaro, diskutuan situatën përtej kufijve jugor libanez.
Nuk u dhanë më shumë detaje për takimin e zhvilluar në Bejrut.
Situata në zonat kufitare mes Izraelit dhe Libanit mbetet e rrezikshme, pasi luftimet mes Izraelit dhe grupeve palestineze në Gaza po intensifikohen.
Të shtunën, grupi i rezistencës ‘Hamas’ me bazë në Gaza nisi operacionin “Tufani i Aksasë” kundër Izraelit, duke lëshuar një breshëri raketash. Grupi tha se sulmi i befasishëm ishte në përgjigje të sulmit ndaj xhamisë Al-Aksa në Kudsin Lindor të pushtuar dhe rritjes së dhunës së kolonëve.
Ushtria izraelit në hakmarrje nisi një operacion kundër grupit ‘Hamas’ në Rripin e Gazës.
Ministria e Shëndetësisë me bazë në Gaza njoftoi se mes luftimeve të vazhdueshme numri i palestinezëve të vrarë nga forcat izraelite në Gaza është rritur në 560, ndërsa numri i personave të lënduar është rritur në 2.900.
Ndërkohë, sipas Ministrisë izraelite të Shëndetësisë, të paktën 800 izraelitë janë vrarë dhe mbi 2.300 të tjerë janë plagosur në luftime./I.S
