Mbrëmjen e sotme në emisionin “Open”, vëmendja u rikthyer edhe një herë në operacionin antidrogë “Flakë ne det”, në sajë të të cilit ra në pranga shefi i Komisariatit të Laçit, Dritan Metaj. Ky i fundit akuzohet për bashkëpunim me grupin kriminal të ‘baronit’ të drogës, Gëzim Çela.
Gazetarja Klodiana Lala u shpreh se Metaj prej kohësh ka pasur lidhje dhe kontakte me Çelën, duke e favorizuar atë në trafikun e drogës, dhe duke i dhënë informacion për operacionet e policisë.
“Metaj ka pasur njohje dhe lidhje të vjetra me Çelën, i cili prej 2014 është në arrati, pasi shndërroi vilën e tij në një laborator kokaine, por dhe për akuza të tjera. Metaj e informonte atë për aksionet e policisë, i jepte ndihmesë edhe përmes automjeteve të policisë duke lëvizur. E gjithë zona e Fushë-Kuqes e thonë hapur që Çela nuk ka lëvizur asnjëherë nga zona. Pra Metaj ka pasur dijeni edhe për drogën që do shkëmbehej në det.
Metaj mbahej në vëzhgim prej disa muajsh. Ai mohon pjesën që ka të bëjë me trafikun e drogës, por thotë se ka pasur njohje me të dhe ‘pranon gabimi’. Por prokuroria beson të kundërtën, që ai ka pasur informacione për lëvizjen e drogës.
