Ministri i Brendshëm Taulant Balla, në një reagim në rrjetet sociale ka theksuar se Policia e Shtetit është duke rritur vigjilencën karshi ndërtimeve pa leje. Sipas tij, nuk do të ketë asnjë tolerim në këtë drejtim.
Reagimi i ministrit Balla, vjen pas lajmit të arrestimit të katër ish-punonjësve të Inspektoratit Vendor të Mbrojtjes së Territorit (IVMT) dhe 2 punonjësve të IKMT (përgjegjës për territorin e bashkisë Sarandë).
Këta shtetas dyshohet se me mosveprimet e tyre, lejuan disa ndërtime të paligjshme në zonën e Ksamilit, Sarandë.
“Përgëzoj Policinë e Sarandës dhe të Shkodrës për hetimin e fenomenit të ndërtimeve pa leje dhe vendosjen para drejtësisë të inspektorëve të IMT dhe IKMT për bashkëfajësi me shkelësit e ligjit. Ndërtimet pa leje janë sekuestruar dhe hapësirat e zëna prej tyre do të lirohen menjëherë”, thekson Balla.
Sipas Ballës, nuk ka më tolerancë për askënd dhe askund ku shkelet ligji.
“Policia e Shtetit po rrit vigjilencën kundër ndërtimeve pa leje dhe çdo shfaqje tjetër abuzive apo krimi mjedisor. Kush nuk ka vënë mend nga kjo histori, duhet të kuptojë se nuk ka më tolerancë për askënd dhe askund.
Ne do të rrisim bashkëpunimin me agjencitë e tjera ligjzbatuese për identifikimin, penalizimin, shembjen apo konfiskimin për interes publik të të gjitha sipërfaqeve në pallate, qendra biznesi, hotele të ndërtuara në shkelje të ligjit”, nënvizon Balla.
Këtë të martë Policia ka goditur raste të ndërtimeve pa leje në Shkodër e Sarandë./ S.M
