Gjermania forcon kontrollet në kufi, përshpejton planet për dëbimin e azilkërkuesve
Autoritetet gjermane po përballen me një rritje të numrit të emigrantëve të paligjshëm. Qeveria ka urdhëruar që forcimin e kontrolleve në zonat kufitare me Poloninë, Zvicrën, Austrinë dhe Republikën Çeke), një veprim që kancelari Olaf Scholz e ka cilësuar tepër të nevojshëm.
Oficerët e armatosur të policisë kontrollojnë të gjitha makinat të cilat arrijnë në këto pika kufitare. Në javët e fundit policia ka arrestuar disa kontrabandistë që transportonin dhjetra emigrantë të cilët tentonin të hynin në Gjermani në mënyrë të paligjshme.
Altenberg është një qytet i vogël në Saksoni, afër Republikës Çeke tanimë po bëhet epiqendra e një niveli të paprecedentë të emigrantëve të paligjshëm. Pjesa më e madhe e migrantëve vijojnë kryesisht nga vendet e Lindjes së Mesme, nga zonat e konfliktit, për shkak të varfërisë si dhe ndryshimeve klimatike.
Numri i personave që kanë hyrë ilegalisht në Gjermani në Shtator arriti në mbi 21 mijë, shifra më e lartë mujore që nga fillimi i vitit 2016, sipas Policisë Federale. Vendi mbetet një destinacion kryesor për azilkërkuesit. Në Gusht, kalimet e paligjshme arritën në mbi 14 mijë, 66% më shumë se në të njëjtin muaj të vitit të kaluar.
Planet për të përshpejtuar dëbimet e azilkërkuesve tanimë sipas kancelarit Olaf Scholz do të vendosen në zbatim, një thirrje që ai e ripërsëriti edhe gjatë vizitës së tij në Nigeri. Përpjekjet për të trajtuar emigracionin e parregullt po ecin paralelisht me përpjekjet për të plotësuar mungesën e fuqisë punëtore duke tërhequr punëtorë të huaj të kualifikuar. Gjermania ka marrë gjithashtu më shumë se një milion njerëz nga Ukraina kryesisht gra dhe fëmijë pas pushtimit të plotë të Rusisë.
E njëjta situatë është edhe në kufirin hungarez. Një përleshje me armë mes kontrabadistëve si dhe policisë i mori jetën tre emigrantëve afganë të cilët e shikojnë rrugën përmes Ballkanit Perëndimor për në BE si destinacionin kryesor.
Me emigracionin e paligjshëm po lufton edhe Spanja. Një total prej 30 mije emigrantësh kanë arritur në Ishujt Kanarie në Atlantik në 10 muajt e parë të këtij viti, duke iu afruar një rekordi të plotë të vitit 2006./ O.S
