Rrëshqitje masive gurësh dhe inertesh në aksin Elbasan-Librazhd në vendin e quajtur “Çezma e Myftarit-Kthesat e Murrashit”.
Stuhitë e shiut që ranë deri në mesnatën e kaluar bënë që nga malet aty pranë të shkëputen masivë të mëdha gurësh dhe masash shkëmbore duke bllokuar përkohësisht qarkullimin e automjeteve.
Për median bëhet e ditur se nuk raportohen dëme në njerëz, por mjetet kanë pësuar dëmtime të ndryshme, kryesisht në goma për shkak të gurëve.
Për zhbllokimin e rrugëve janë angazhuar vetë drejtuesit e automjeteve deri në mbërritjen e kompanisë që mirëmban këtë aks rrugor. Gjatë natës, deri në orët e para të mëngjesit është punuar për largimin e gurëve dhe mbajtjen hapur të këtij aksi të rëndësishëm kombëtar.
Edhe qyteti i Librazhdit u përfshi nga rrebeshe të mëdha shiu duke shkaktuar përmbytje dhe dëme në njësi tregtare./O.S
