Sezoni i festave po afron! E padyshim që mendja na shkon te dhuratat. Kur bëhet fjalë për këto të fundit, ne të gjithë do të donim t’u jepnim më të mirën miqve të dashur. Roli i Babagjyshit mund të jetë një siklet më vete, prandaj jemi ne këtu për t’ju lehtësuar punë.
Dhuratat e personalizuara
Dhuratat e personalizuara janë gjithnjë të veçanta, sepse tregojnë përkushtim dhe janë unike. Konsideroni sende të personalizuara, si filxhanë me filmin e tij/saj të preferuar apo albume fotografish të mbushura me kujtimet tuaja. Këto dhurata tregojnë se nuk keni blerë diçka rastësore.
Komoditeti mbi gjithçka
Dhuratat “e ngrohta” janë gjithnjë të pranueshme në dimër. Prandaj mund t’u dhuroni miqve batanije komode, çorape të ngrohta, pantofla prej pellushi, shall ose një set pizhamash.
Kujdesi për veten
Për ata që janë të fiksuar me kujdesin e lëkurës, trupit dhe vetes në përgjithësi, ne ju sugjerojmë: set për trajtimin e lëkurës, krem trupi me një aromë të ëmbël, maskë për gjumë, një masazhues trupi ose set me disa parfume të vegjël.
Përvojë ekskluzive
Ndonjëherë, dhuratat më të mira janë përvojat, sesa sendet fizike. Mund t’u dhuroni një kupon në një qendër SPA; të rezervoni dy bileta avioni për diku jashtë; të organizoni një udhëtim në një vend me borë; të shihni një film në kinema etj.
Dhuratat që janë gjithmonë OK
Nëse ndodh që deri në minutën e fundit nuk keni vendosur asgjë, atëherë surprizojini me dhuratat që janë gjithmonë të pranueshme: çokollata, libër, një shishe verë, shportë me ushqime dhe ëmbëlsira./E.Ç
