Një tjetër komandant lufte në Evropë po grumbullon ushtrinë e tij private pas vdekjes së Yevgeny Prigozhin në një aksident ajror të supozuar. Udhëheqësi çeçen Ramzan Kadyrov, i cilësuar shpesh si ‘qeni sulmues’ i Vladimir Putinit besohet se po forcon ushtrinë e tij personale në kurriz të Rusisë.
Mijëra rekrutë pritej të dislokoheshin në Ukrainë për të rritur numrin, por ka dyshime për një motiv të fshehtë.
Një teori është se njerëzit e Kadyrov po mbahen në rezervë për të shtypur çdo rebelim kundër Putinit pasi protestat shpërthyen në republikën e Bashkortostan në fillim të këtij muaji.
Një tjetër ide është se në rast të vdekjes së presidentit rus, Kadyrov mund të shkëputet nga Rusia dhe të krijojë një shtet të pavarur. Duke ngritur formacione të reja ushtarake, 47-vjeçari “po forcon efektivisht ushtrinë e tij personale në kurriz të buxhetit federal [rus]”, sipas medias së pavarur Kavkaz Realii, pjesë e Radio Evropa e Lirë.
Regjimentet e quajtura Akhmat-Rusia dhe Akhmat-Çeçenia nën Ministrinë e Mbrojtjes së Rusisë, u krijuan për pjesëmarrje në luftën kundër Ukrainës, por datat e vendosjes së tyre në front janë ende të panjohura. Në fund të majit 2023, ishin ‘përzgjedhur’ 2,400 rekrutë, por madhësia aktuale e ushtrisë së tij private aktuale është e paqartë. Në të kaluarën, kryekomandanti mburrej se kishte dhjetëra mijëra ushtarë nën komandën e tij. Midis luftëtarëve të tij janë edhe ish-mercenarët e Wagner-it, dikur besnikë ndaj Prigozhin.
Analisti politik Mikhail Savva tha: “Ka një tepricë të qartë të këtyre njësive ushtarake në Çeçeni.
“Është absolutisht e qartë se kjo është bërë në interes të Kadyrov personalisht dhe regjimit të tij, dhe kundër interesave të qeverisë federale të Rusisë. Forca e tij mund të përdoret “në rast të ndonjë destabiliteti apo destabilizimi brenda Rusisë”.
Savva shtoi: ‘Kadyrov duhet të kuptojë se regjimi aktual rus është shumë i paqëndrueshëm dhe kolapsi i tij i papritur mund të ndodhë. “Në atë rast, ai do të ketë ushtrinë e tij, e cila do t’i lejojë, siç është tashmë e dukshme, jo vetëm të kontrollojë territorin e republikës, por edhe të ushtrojë ndikim në rajonet fqinje./E.T
