Akuzat që rëndojnë mbi ish-ministrin e Drejtësisë dhe kryetarin e Komisionit të Sigurisë në Parlament kanë vënë në një pozitë delikate Nasip Naçon, pas deklaratave tronditëse të Nuredin Dumanit, bashkëpunëtor i drejtësisë, në seancën gjyqësore për procesin e bujshëm “Plumbi i Artë”. Gjatë dëshmisë së tij në Gjykatën e Posaçme Kundër Korrupsionit dhe Krimit të Organizuar (GJKKO), Dumani tha se kishte paguar një shumë prej 40 mijë eurosh për t’u liruar nga burgu.
Sipas tij, këto para i ishin dorëzuar dhëndrit të vëllait të ish-deputetit Nasip Naço, i cili, në atë periudhë, mbante detyrën e shefit të spitalit dhe kishte siguruar një raport mjekësor që vërtetonte probleme shëndetësore. Ky raport, sipas pretendimeve, kishte qenë vendimtar për lirimin e Dumanit nga qelia.
Deklarata e Dumanit ka tronditur opinionin publik dhe ka hapur një debat të ri për korrupsionin në sistemin e drejtësisë. Në qendër të vëmendjes ka përfunduar emri i ish-ministrit Nasip Naço, i cili ka reaguar menjëherë duke mohuar çdo lidhje me çështjen.
Reagimi i Naços: Distancohem nga akuzat
Në një postim në rrjetet sociale, Nasip Naço ka kërkuar një hetim të thelluar për të vërtetuar akuzat dhe ka theksuar se distancohet plotësisht nga çdo pretendim i bërë publik. “Jam njohur sot nga mediat ku përmendet emri im. Dua të theksoj se distancohem nga çdo akuzë e bërë publike dhe ftoj organet e drejtësisë që të kryejnë një hetim të thelluar mbi këtë rast. Nëse akuzat vërtetohen, organet përkatëse duhet të marrin masa ligjore ndaj çdo personi të përfshirë në këtë çështje,” shkroi Naço. Ai shtoi gjithashtu se roli i ministrit të Drejtësisë është i kufizuar në raste të tilla, duke nënvizuar se nuk ka patur asnjë kompetencë për të ndikuar në lirimin e Dumanit.
Politika nën presion
Kjo situatë ka krijuar një tjetër pështjellim në skenën politike shqiptare, ku çështjet e korrupsionit vazhdojnë të jenë një ndër temat më të diskutuara. Edhe pse Naço ka kërkuar një hetim të drejtë, opozita ka shfrytëzuar rastin për të ngritur pikëpyetje mbi integritetin e qeverisjes së kaluar dhe të sistemit të drejtësisë në përgjithësi. Procesi “Plumbi i Artë” po kthehet në një provë delikate jo vetëm për sistemin e drejtësisë, por edhe për politikën shqiptare, duke nxjerrë në pah dobësitë strukturore dhe perceptimin publik për një sistem të ndikuar nga korrupsioni dhe interesat personale. Ndërkohë, pritet me interes se çfarë do të nxjerrin hetimet dhe si do të ndikojnë këto zhvillime në arenën politike dhe juridike të vendit.
