Administrata shqiptare vlerësohet, por sfidat mbeten

Administrata publike shqiptare është renditur e para në rajon sipas raportit të fundit të OECD/SIGMA, një nismë e përbashkët e Bashkimit Europian dhe Organizatës për Bashkëpunim Ekonomik dhe Zhvillim. Në një event të zhvilluar në Tiranë, drejtuesi i programit SIGMA, Gregor Virant, prezantoi gjetjet kryesore të raportit, duke theksuar progresin e Shqipërisë në fusha si prokurimet publike, menaxhimi i financave dhe qeverisja digjitale. Në këtë raport, Shqipëria vlerësohet për dixhitalizimin e shërbimeve publike, duke arritur një nivel të përafruar me mesataren e Bashkimit Europian. Një tjetër pikë e fortë e administratës shqiptare është legjislacioni i konsoliduar, i cili, sipas raportit, është përafruar në masën 81% me atë të BE-së. Gjithashtu, u vlerësua edhe fakti që nëpunësit civilë shqiptarë shprehen në masë të madhe të kënaqur me punën e tyre. Megjithatë, raporti evidentoi edhe problematika që kërkojnë adresim. Një ndër sfidat kryesore mbetet niveli i lartë i drejtuesve administrativë, të cilët sipas SIGMA-s nuk plotësojnë plotësisht standardet e bazuara në meritë. Po ashtu, besimi mes ministrave dhe drejtuesve të lartë të administratës konsiderohet një element që duhet përmirësuar, ndërsa çështjet e mbartura administrative në gjykatë mbeten një sfidë për funksionimin efikas të sistemit. Gjetjet e raportit u komentuan edhe nga kryeministri Edi Rama, i cili e vlerësoi këtë analizë si një burim të pazëvendësueshëm njohurish për zhvillimin e mëtejshëm të administratës publike. Rama pranoi se ka ende probleme, sidomos në menaxhimin e lartë administrativ, por theksoi se dixhitalizimi ka sjellë përmirësime të ndjeshme në shërbimet ndaj qytetarëve. Ai njoftoi se qeveria ka nisur testimin e inteligjencës artificiale për të adresuar mbivendosjet në legjislacion dhe për të përmirësuar transparencën në prokurimet publike. Ministrja e Shtetit për Administratën Publike, Adea Pirdeni, njoftoi se brenda muajit mars do të dalin për konsultim publik ndryshimet në ligjin për nëpunësin civil dhe atë për organizimin dhe funksionimin e administratës civile. Këto reforma synojnë të forcojnë profesionalizmin dhe meritokracinë në administratën shtetërore. Administrata publike dhe prokurimet janë kapituj kyç në negociatat për anëtarësimin e Shqipërisë në Bashkimin Europian, dhe raportet e OECD/SIGMA konsiderohen burime të rëndësishme për vlerësimin e progresit. Vlerësimi i fundit për Shqipërinë nga SIGMA është kryer në vitin 2021, dhe raporti i ri ofron një panoramë të detajuar të përparimeve dhe sfidave që mbeten për t’u adresuar./k.k