Vendimi për mbylljen e TikTok-ut në Shqipëri ka shkaktuar reagime të shumta, duke ndarë përdoruesit në dy kampe. Disa e shohin atë si një masë të nevojshme, ndërsa të tjerë e konsiderojnë një kufizim të panevojshëm.
Sipas ekspertes së IT, Denisa Kele, problemi nuk është vetë ekzistenca e TikTok-ut, por mënyra se si përdoret nga shoqëria.
“Mediat sociale janë thjesht një pasqyrë e asaj që reflektojmë si shoqëri. Dhe e gjithë baza është te parimi si shoqëri, dhe duhet të bëjmë një pikëpyetje shumë të madhe sot: pse shoqëria jonë ka kaq shumë urrejtje, pse kjo urrejtje më pas transmetohet në një media sociale siç është TikTok-u?”, tha Kele [per Vizion Pus.
Sipas saj, një zgjidhje më efektive do të ishte vendosja e filtrave kufizues në vend të ndalimit të plotë.
“Patjetër, TikTok-u ka pasur rrezikshmëri të lartë pasi nuk ka pasur filtra si rrjetet e tjera sociale. Por unë padyshim mendoj se qeveria shqiptare, nëse do të kishte bashkëpunim, mund të vendoste rregullatorët e saj dhe të mos e censuronte plotësisht”, tha Kele.
Ndërkohë, përdoruesit po orientohen drejt aplikacioneve alternative, mes tyre edhe Clapper, i cili, sipas ekspertes, mund të jetë edhe më i rrezikshëm. Ajo këshillon të shmanget përdorimi i këtij aplikacioni, pasi edhe ai, njësoj si TikTok-u, ka mungesë filtrash dhe mekanizmash mbrojtës./ S,M
