Shtyhet afati për dorëzimin e Deklaratës ‘DIVA 2024’, e njoftuar fillimisht për ditën e sotme.
Ministri i Ekonomisë, Petrit Malaj ka njoftuar nëpërmjet një postimi në rrjetet sociale, se meqënëse sot, datë 31 mars 2025, është pushim zyrtar për shkak të festës së Fitër Bajramit, ka një shtyrje afati me 1 ditë.
Tatimpaguesit njoftohen se afati i fundit për dorëzimin e ‘DIVA 2024’ është data 1 Prill 2025.
Kujtojmë se personat që duhet të plotësojnë këtë deklaratë janë individët rezidentë dhe jorezidentë, që gjatë vitit 2024: kanë pagë bruto vjetore mbi 1.2 milionë lekë, janë të dypunësuar, të paktën për një periudhë tatimore brenda vitit, realizojnë të ardhura nga burime të tjera mbi 50 mijë lekë në vit për të cilat nuk është mbajtur tatimi në burim.
Ata duhet të plotësojnë “Deklaratën Vjetore të të Ardhurave Personale”, si detyrim ligjor i individit, subjekt i deklarimit.
Parashikohet që numri i deklaruesve të DIVA 2024 të jetë mbi 144 mijë individë, duke pasur parasysh që me hyrjen në fuqi të ligjit të ri, me uljen e kufirit nga 2 milionë në 1.2 milionë, numri i deklaruesve pritet të jetë shumë më i lartë se vitet e mëparshme.
Deklarata DIVA 2024, gjenerohet e paraplotësuar automatikisht me të dhënat e të ardhurave vjetore bruto nga pagat apo shpërblimet nga marrëdhëniet e punësimit për individët, si edhe me përllogaritjen e tatimit mbi të ardhurat nga punësimi./S,M
