Nënkryetari i Këshillit të Sigurisë së Rusisë, Dmitry Medvedev, ka njoftuar një paralajmërim të ashpër ndaj Ukrainës.
Në njoftimin e tij, Medvedev ka thënë se nëse Kievi ndërmerr ndonjë sulm ndaj Moskës gjatë festimeve të Ditës së Fitores më 9 maj, atëherë askush nuk mund të garantojë që kryeqyteti ukrainas do të mbijetojë deri më 10 maj.
Deklarata e Medvedevit vjen pas refuzimit të Presidentit ukrainas Volodymyr Zelenskyy për të pranuar një armëpushim tre-ditor të shpallur nga Presidenti rus Vladimir Putin.
Sipas Kremlinit, armëpushimi do të ishte në fuqi nga 8 deri më 10 maj, për të përkujtuar 80-vjetorin e fitores së Bashkimit Sovjetik dhe aleatëve në Luftën e Dytë Botërore.
Putin pritet të presë liderë ndërkombëtarë në Moskë gjatë kësaj periudhe, përfshirë Presidentin e Kinës, Xi Jinping, në ceremonitë zyrtare të Ditës së Fitores më 9 maj.
Nga ana tjetër, Zelenskyy ka refuzuar ndalesën tre-ditore, duke e konsideruar atë të pamjaftueshme. Ai ka kërkuar një armëpushim prej të paktën 30 ditësh, duke argumentuar se një pauzë më e gjatë është e nevojshme për të krijuar hapësirë për negociata serioze, por Moska nuk e ka pranuar./E.S
