Një ditë para zgjedhjeve parlamentare në Shqipëri, presidenti i Turqisë, Rexhep Taip Erdogan, ka zhvilluar një bisedë telefonike me kryeministrin Edi Rama. Në një moment kur ka nisur numërimi mbrapsht për forcat politike, por edhe për qytetarët që do të japin verdiktin e tyre, Erdogan ka telefonuar të parin e qeverisë shqiptare.
Siç raportohet në mediat turke, gjatë bisedës janë diskutuar marrëdhëniet dypalëshe ndërmjet Turqisë dhe Shqipërisë, si dhe është folur për zhvillimet rajonale e globale. Mësohet se presidenti Erdogan ka theksuar rëndësinë e miqësisë dhe dialogut me vendin tonë, si dhe është shprehur besimplotë se bashkëpunimi mes dy vendeve do të thellohet më tej.
Ai gjithashtu ka vlerësuar organizimin në Shqipëri të Samiteve të Komunitetit Politik Evropian dhe Procesit të Bashkëpunimit të Evropës Juglindore, duke e cilësuar këtë si një dëshmi të profilit ndërkombëtar. Në këtë kontekst, nuk kanë munguar as urimet e Erdogan për sukses. Presidenti i Turqisë nuk mund të linte pa përmendur edhe zgjedhjet parlamentare që do të zhvillohen nesër në vendin tonë duke uruar që të jenë të mbara dhe suksesshme. m.p.
