E kaluara kundrejt së ardhmes! Një betejë në të tashmen! Kristiano Ronaldo (Portugali) dhe Lamin Jamal (Spanjë), përkatësisht 40 dhe 17 vjeç, u siguruan ekipeve të tyre kombëtare një vend në finalen e Ligës të Kombeve dhe do të përballen me njëra-tjetrën të dielën në kërkim të trofeut.
Finalja e Mynihut do të jetë një duel brezash midis një lojtari në fund të karrierës së tij dhe një tjetri që po shkruan prologun. Një përballje midis njërit prej burrave që përcaktuan një epokë përkrah Lionel Mesit dhe një tjetri që duket i destinuar t’i “imitojë” ata. “Padyshim, të gjithë lojtarët kanë shumë respekt për të. Ai është një legjendë e futbollit. Unë do të bëj punën time, që është të fitoj. Dhe kaq është”, tha Jamal me kapelen e kthyer mbrapsht, në një konferencë për shtyp të enjten kur u pyet për ndeshjen e tij të parë në karrierë kundër Kristiano Ronaldos.
IMITIMI NË FESTIM – Jamal sapo ishte shpallur lojtari i ndeshjes në fitoren 5-4 ndaj Francës në gjysmëfinale, ku ai shënoi dy gola që rezultuan vendimtarë, ashtu si edhe Kristiano një ditë më parë kur shënoi golin e fitores për Portugalinë në fitoren 2-1 ndaj Gjermanisë, vendit organizator të këtij “Final Four”.
Pasi shënoi golin e tij të dytë kundër francezëve, që e çoi përkohësisht rezultatin 5-1, Jamal festoi në një mënyrë që të kujtonte drejtpërdrejt një nga festimet më ikonike të Kristiano Ronaldos, kur ai u ul në një tabelë reklamash dhe buzëqeshi. Kristiano Ronaldo e ka dhuruar këtë shfaqje në disa raste, përfshirë edhe gjatë periudhës së tij të fundit me Al Nasr në Arabinë Saudite, por festimi u bë veçanërisht i famshëm kur ai e performoi atë kundër Atletikos së Madridit në gjysmëfinalet e Ligës së Kampioneve të vitit 2017.
MREKULLIA – Jamal, i cili mbush 18 vjeç muajin tjetër, padyshim që ka ende shumë për të bërë për të barazuar karrierën e Kristiano Ronaldos (137 gola për Portugalinë në 220 ndeshje ndërkombëtare), por për momentin arritjet dhe pjekuria e tij janë mbresëlënëse. Ai është një nga favoritët për të fituar “Topin e Artë” të ardhshëm, çmimin individual më prestigjioz në futboll, të cilin Kristiano Ronaldo e ka fituar pesë herë, herën e parë në vitin 2008, kur ishte 23 vjeç.
Ende 16 vjeç, Jamal fitoi Kampionatin Evropian me Spanjën, një turne që ylli portugez e kishte fituar një herë më parë, në vitin 2016, kur ishte 31 vjeç. Paraqitja e të riut katalanas në skenën e futbollit i ka fituar atij lëvdata gjatë dy viteve të fundit, përfshirë edhe nga vetë Ronaldo. “Mendoj se ai ka shumë talent dhe potencial. Do të shohim se çfarë do të ndodhë gjatë rrugës, por mendoj se do t’ia dalë mbanë”, tha lojtari portugez shtatorin e kaluar në kanalin “YouTube” të ish-futbollistit Rio Ferdinand./e.t
