Kombëtarja e Shqipërisë në futboll barazoi 0-0 kundër Serbisë të shtunën në “Arenën Kombëtare”. Pjesë e stafit serb si trajneri i portierëve është edhe Goran Cumic, një ish-portier i disa klubeve.
Trajneri shqiptar Mirel Josa ka përfituar nga rasti që Goran Cumic ndodhej në Tiranë dhe mes të dyve ka pasur një takim të përzemërt. Por çfarë e lidh dyshen?
Më shumë se 30 vite më parë të dy kanë qenë pjesë e AO Kavala në Greqi. Mirel Josa, një mesfushor me tipare sulmuese do duhet t’i ketë shënuar shumë gola asokohe serbit Goran Cumic në stërvitje.
Ka qenë vetë trajneri shqiptar që ka postuar dy foto nga takimi me ish-bashkëlojtarin, duke kujtuar kohën kur të dy ndanin të njëjtat dhoma zhveshjeje.
“Takim pas më shumë se 30 viteve me Goran Cumic”, shkruan Josa. Pas këtij postimi ka pasur edhe kritika në Kosovë për këtë takim dhe përqafim. m.p.
