Gianni De Biasi mund të rikthehet të veshë uniformën kuqezi të stërvitjes, por këtë herë jo si trajner i Kombëtares shqiptare, por me ngjyrat e Flamurtarit. Klubi vlonjat është në kërkim të një trajneri me peshë për të ndërtuar një skuadër konkurruese që të luftojë për titullin kampion dhe presidenti Sinan Idrizi ka treguar se është i gatshëm të investojë.
Pesë vite pas rikthimit në elitë, Flamurtari po përgatit një revolucion që duket se do të fillojë nga pankina. Në listën e kandidatëve për trajner janë përmendur emra të njohur si Shpëtim Duro, Gentian Mezani dhe Gianni De Biasi.
Edhe pse pista e De Biasit duket më e largët, ajo nuk përjashtohet si mundësi. Ish-trajneri i Shqipërisë në Euro 2016 ka lidhje të forta me futbollin ndërkombëtar dhe nëse do të firmoste me Flamurtarin, nuk do të ishte surprizë që në skuadër të vinin afrime me peshë.
Flamurtari ka nisur nga puna konkrete, kontaktet me kandidatët janë bërë dhe ofertat janë në tavolinë. Vendimi për trajnerin pritet të merret në ditët e ardhshme./e.t
