Dy të rinj nga Tottenham janë shpallur fajtorë për vrasjen e shtetasit shqiptar Ervin Baraku, i cili u godit për vdekje me thikë pranë një stacioni metroje në Londër.
Sipas Policisë Britanike, Kevin Nguyen dhe Milumo Pedrinho, të dy 21 vjeç, u përfshinë në një përplasje me Barakun, 33 vjeç, më 23 korrik 2024, në një rrugë pranë stacionit të metrosë.
Konflikti përshkallëzoi në dhunë, kur dy të rinjtë e ndoqën viktimën në brendësi të stacionit. Aty, Pedrinho e goditi atë me një thikë, çka çoi në rrëzimin e Barakut nga shkallët dhe në plagë të rënda.
Pavarësisht ndërhyrjes së shpejtë të shërbimeve mjekësore dhe transportimit urgjent në spital, Baraku nuk arriti të mbijetonte dhe ndërroi jetë më 30 korrik, një javë pas sulmit.
Nguyen u arrestua ditën pas ngjarjes, ndërsa Pedrinho u kap disa ditë më vonë, pas një hetimi intensiv të autoriteteve britanike.
Superintendenti i Detektivëve, Sam Blackburn, e përshkroi ngjarjen si një “sulm të pakuptimtë dhe tragjik”, duke shtuar se “nuk ka vend për dhunë në rrjetin hekurudhor”. m.p.
