Irani ka sinjalizuar me urgjencë se kërkon t’i japë fund armiqësive dhe të rifillojë bisedimet mbi programet e tij bërthamore, duke u dërguar mesazhe Izraelit dhe SHBA-së nëpërmjet ndërmjetësve arabë, thanë zyrtarë të Lindjes së Mesme dhe Evropës, për median amerikane Wall Street Journal.
Në mes të një fushate të egër ajrore izraelite, Teherani u ka thënë zyrtarëve arabë se do të jenë të hapur për t’u rikthyer në tryezën e negociatave për sa kohë që SHBA-të nuk i bashkohen sulmit, thanë zyrtarët, citon Wall Street Journal. Ata gjithashtu i përcollën mesazhe Izraelit duke thënë se është në interes të të dyja palëve që dhuna të mbahet nën kontroll, shkruan A2 CNN.
Por, me avionët luftarakë izraelitë që fluturojnë lirshëm mbi kryeqytetin dhe kundërsulmet iraniane që shkaktojnë dëme minimale, udhëheqësit izraelitë kanë pak nxitje për të ndaluar sulmin e tyre përpara se të arrijnë qëllimet për të shkatërruar uzinat bërthamore të Iranit dhe për të dobësuar më tej pushtetin e qeverisë teokratike të Ajataollah Ali Khomeneit.
Sulmet ajrore izraelite kanë vrarë udhëheqës të rëndësishëm ushtarakë, përfshirë pjesën më të madhe të nivelit të lartë të forcave ajrore të Iranit, duke e lënë Udhëheqësin Suprem Ajatollah Ali Khamenei gjithnjë e më të izoluar. Por ndikimi në objektet bërthamore ka qenë modest dhe analistët thonë se mund të duhet një luftë e gjatë ajrore për të arritur rezultatet që dëshiron Izraeli, shkruan A2 CNN.
Sigurimi i një pauze mund t’i jepte Iranit hapësirë për t’u riorganizuar dhe për të ndërtuar presion ndërkombëtar kundër fushatës së Izraelit. Do të ishte gjithashtu një fitore për Teheranin të ndalonte SHBA-në të sillte në luftë aftësitë e saj ushtarake për shkatërrimin e bunkerëve.
“Iranianët e dinë se SHBA-të po e mbështesin Izraelin në mbrojtjen e tij dhe janë të sigurt se SHBA-të po e mbështesin logjistikisht Izraelin”, tha një zyrtar arab. «Por ata duan garanci se SHBA-të nuk do t’u bashkohen sulmeve, citon Wall Street Journal.
Nuk ka asnjë tregues se Irani është gati të bëjë lëshime të reja në bisedimet bërthamore, thanë ndërmjetësit arabë. Përpjekja diplomatike e udhëhequr nga administrata Trump u ngec për shkak të refuzimit të Iranit për të ndaluar pasurimin e uraniumit përpara se bisedimet të ndërpriteshin nga sulmet e Izraelit javën e kaluar.
Vendet e Gjirit Persik, përfshirë Arabinë Saudite, Katarin dhe Omanin, kanë lobuar te SHBA-të që të ushtrojnë presion mbi Izraelin që të ndalojë luftimet, thanë zyrtarët arabë. Ata kanë paralajmëruar se konflikti mund të zgjerohet nëse Izraeli dhe Irani nuk kthehen në tryezën e negociatave, duke vënë në rrezik asetet e energjisë aty pranë të Gjirit Persik me pasoja potencialisht të rëndësishme për tregjet e naftës dhe ekonominë globale, thekson Wall Street Journal. m.p.
