Mbrëmjen e djeshme në qytetin italian të Tolentinos u zhvillua një marshim në nderim të Gentiana Hudhrës, gruas shqiptare që u vra brutalisht nga ish-bashkëshorti i saj, Nikollaq Hudhra.
Ngjarja tronditëse ka prekur thellë komunitetin, ndërsa në manifestim mori pjesë edhe djali i viktimës, i cili nuk i përmbajti emocionet mes dhimbjes së humbjes.
Mes qindra qytetarëve që marshuan për drejtësi dhe kundër dhunës ndaj grave, ishte edhe këshilltarja rajonale Linda Elezi. Me një fjalim prekës, ajo denoncoi jo vetëm aktin barbar, por edhe indiferencën shoqërore që shpesh i paraprin tragjedive të tilla.
“Si grua, si politikane, si shqiptare, e them me zë të qartë: Gentiana nuk u vra nga një burrë, por nga një dashuri e sëmurë, që maskohet si ndjenjë, por në të vërtetë është kontroll, dhunë dhe çmenduri.”-deklaroi Elezi.
Ajo theksoi se ligjet nuk janë të mjaftueshme për të mbrojtur gratë, nëse nuk shoqërohen me një ndërgjegjësim të thellë shoqëror.
“Nuk duhet të vdesësh pse ke pasur forcën të largohesh nga dhuna, të ndërtosh jetën tënde nga e para. Dashuria nuk është dhunë, as frikë, as kontroll.”-vijoi ajo.
Në përfundim të fjalës, Elezi bëri thirrje për veprim të përditshëm, jo vetëm reagim pas tragjedisë.
“Duhet të ndërtojmë një kulturë jete e respekti. Lotët pas një vrasjeje nuk mjaftojnë më. Na duhet zë, guxim dhe reagim për çdo grua që jeton në frikë.” m.p.
