Nga inovacioni, mjedisi, ndërlidhja rajonale e deri tek përfshirja sociale. 41 milionë euro do të investojë Bashkimi Evropian në 43 projekte të shpallura fituese në kuadër të “Interreg IPA South Adriatic”, që përfshijnë Shqipërinë, Malin e Zi dhe 2 rajone të Italisë, Puglia dhe Molise.
Për Shqipërinë fondet do të menaxhohen nga SASPAC, dhe sigurisht nga të dërguarit e Brukselit një mesazh ishte dhe për monitorimin e përdorimit të fondeve, duke pasur parasysh rastin në SASPAC kur Ilir Beqaj ish drejtues i saj është i arrestuar për abuzime. Rregulla të reja thotë BE do të zbatohen për lëvrimin e parave.
“Po përjetojmë kohëra që ndryshojnë në mënyrë të vazhdueshme. Edhe në BE do të aplikohen një numër i konsiderueshëm rregulloresh në Bruksel, që do të ndryshojnë edhe të ardhmen e fondeve të BE-së. Do doja që ta kuptonit që roli juaj është shumë i rëndësishëm. Sigurisht që vendimet merren larg prej jush nga qeveritë e ndryshme të vendeve të BE-së, por shembulli juaj është i rëndësishëm për vijimin e kësaj politike”, tha Gilles Kittel, Politika Rajonale dhe Urbane e Komisionit Evropian.
Këto projekte të reja që synojnë investime në teknologji, energjinë e gjelbër, në kulturë, shëndetësi apo siguri kibernetike, janë edhe një ‘sprovë’ që Shqipëria duhet të kapërcejë në rrugën e saj të anëtarësimit.
“Investimi prej 41 milionë euro që prek këto projekte nuk është thjeshtë një mbështetje financiare por një investim më të mençur, integruar dhe më të ndjeshëm ndaj nevojave të qytetarëve. Ky financim është një moment edhe për reflektim për sfidat që kemi përpara. Ritmi i zbatimit financiar dhe përthithja e fondeve kërkojnë përkushtim të shtuar”, u shpreh drejtuesja e SASPAC Eridana Çano.
Interreg IPA South Adriatic 2021-2027 është një Program Bashkëpunimi Ndërkufitar i bashkëfinancuar nga Bashkimi Evropian përmes Instrumentit për Para-Anëtarësim dhe synon promovimin e rajonit të Jugut të Adriatikut, për tu bërë më i zgjuar, më i gjelbër, më i lidhur dhe më gjithëpërfshirës. m.p.
