Lojtari i Manchester United, Marcus Rashford, ka thënë se do të dëshironte t’i bashkohej Barcelonës këtë verë dhe të luante me Lamine Yamal. Ai u rikthye në bazë pas përfundimit të huazimit te Aston Villa.
Rashford po kërkon një largim përfundimtar nga “Old Trafford” dhe emri i tij është lidhur me një lëvizje në “Camp Nou” këtë verë. Megjithatë, te Barcelona nuk duken shumë entuziastë, pasi po përpiqen të nënshkruajnë me Nico Williams nga Athletic Club.
Rashford kaloi gjysmën e dytë të sezonit të kaluar në huazim te Aston Villa pasi u ndal nga trajneri Ruben Amorim dhe tani ka bërë publike dëshirën e tij për të bërë një lëvizje në Spanjë.
“Sigurisht që do të doja shumë të luaja te Barcelona”, tha sulmuesi anglez kur u pyet për mundësinë e bashkimit me Barcelonën dhe të luajë me sensacionin adoleshent Yamal.
“Të gjithë duan të luajnë me më të mirët. Shpresojmë… do të shohim. Spanja është e bukur dhe nuk është shumë larg nga shtëpia”, shtoi Rashford.
“Nëse stërvitem këtu për një periudhë të gjatë, është mirë sepse familja ime mund të vijë për disa ditë. Është vetëm një fluturim tre orë. Edhe këtu moti është i mirë”, deklaroi sulmuesi 27-vjeçar anglez. m.p.
