Taulant Malaj, 47-vjeçari shqiptar i akuzuar për vrasjen e vajzës së tij 16-vjeçare, Jessica Malaj, dhe fqinjin Massimo De Santis në Torremaggiore të Foggias, më 7 maj 2023, si dhe për plagosjen e gruas së tij, Tefta Malaj, është dënuar me burgim të përjetshëm dhe izolim gjatë ditës për një vit e gjashtë muaj.
Vendimi u mor këtë të premte nga Gjykata e Krimeve të Rënda të Foggias ndërsa Prokuroria kishte kërkuar të njëjtin dënim gjatë seancës dëgjimore të mbajtur më 30 maj.
Sipas hetimeve, Malaj dyshonte se gruaja e tij kishte një lidhje jashtëmartesore me fqinjin. Ai e përballi De Santis në hyrje të ndërtesës ku banonin dhe e goditi për vdekje me thikë.
Më pas shkoi në banesë me qëllim të vriste edhe bashkëshorten, e cila mbeti rëndë e plagosur. Vajza e tyre, Jessica, ndërhyri për të mbrojtur nënën, por u vra nga i ati.
Kur mbërriti policia, Malaj kishte ende gjak në duar dhe në rroba dhe rrëfeu menjëherë veprën e tij.
