Deputeti socialist Erion Braçe ka reaguar ashpër përmes një denoncimi lidhur me zaptimin e hapësirave publike në zonën e bllokut “1 Maji”, në Tiranë.
Përmes një postimi në rrjetet sociale, Braçe thotë se është zaptuar hapësira publike duke e rrethuar me rrjet trotuarin dhe banorët janë lënë që të kalojnë në korsinë e biçikletave.
‘Hyrja e bllokut 1 maji përballë postës, buzë unazës së vogël, hapësira publike pra, hapësira publike! Ka rrethuar pallatin me gjithë banorë brenda, ka marrë trotuarin, njerëzit i ka hedhur në korsinë e biçikletës dhe më e bukura, i ka hapur vrimë pemës që të rritet!! Batërdi! Bëhu deputet në Tiranë po deshe dhe mbro interesat e njerëzve kështu!’, tha ai.
Ky reagim i Braçes vjen vetëm pak orë pasi, kryeministri Edi Rama i bëri thirrje kujtdo që ka zaptuar hapësirat publike, t’i lirojë ato, ose do përballet me ligjin, me gjoba deri në ndjekje penale. Rama kërkoi që të dalin në terren deputetët e drejtorët e bashkisë së Tiranës, për të evidentuar në 2 javë problemet e qytetarëve. m.p.
